RCAL Oekusi, 10/03/2026; Estudante finalista nain sanulu resin ida (11), hosi Universidade Nasional Timor Lorosa’e (UNTL), Departementu saude animal tersa feira ne’e 10/03/2026, hala’o peskiza ba susu been karau timor durante semana rua (2), iha suku lifau oekusi Sub Rejiaun Pantemakassar.
Vise departementu saude animal UNTL, Alipio De Almeida, hatete, programa peskiza ba karau timor ninia susu been ne’e servisu hamutuk ho diresaun rejional agrikultura no karau nain sira atu bele analiza hodi hasa’e produsaun karau timor tanba peskiza ne’e hetan apoiu fundus hosi governu australia.
Vise departementu ne’e hatete, peskiza ne’e nudar atividade foin primeira ves hala’o iha timor-leste, tanba durante ne’e Timor-Leste rasik seidauk hatene konaba produsaun susu been karau timor ne’e loron ida produs litru hira no sei halo analiza ba susu been ne’e iha moras ka lae tanba bainhira iha moras bele hadaet ba ema nia saude.
Bbiban ne’e, Diretor rejional agrikultura, Jose Oki, hatete, peskiza ne’e importante tebes atu bele dezemvolve susu been karau timor atu nune’e, bele hasa’e produsaun tanba atu hasa’e koantidade numeru ba karau timor presiza halo uluk peskiza.
Jose Oki afirma, ba futuru, Autoridade RAEOA liuhosi diresaun rejional agrikultura oekusi sei aloka orsamentu hodi kria ekipa integradu ida, atu servisu hamutuk ho departementu Saude Animal UNTL hodi hasa’e produsaun ba susu been karau timor nian.
Bazeia ba dadus hosi departementu pekuaria iha diresaun rejional agrikultura oekusi durante ne’e rejista karau timor iha teritoriu raeoa hamutuk rihun sia.
Reportagen Jornalista Media RCAL
Leave a Reply