Ezekusaun OJE 2026 PA Interinu, garante sei halo jestaun di’ak.

Oe-Kussi (RCAL 10 Abril 2026); Interinu Presidente Autoridade Rejiaun Administrativa Espesial Oekusi Ambeno Celestinho Martinho Marques deklara assuntu ne’e ba Jornalista hafoen remata enkontro dala-uluk ho diresaun finansas, Diresaun Planeamentu Aprovizionamentu Kinta ne’e iha salaun Gabinete ZEEDOA Oebau.

Celestinho Martinho Marques hatete, enkontro ne’e, nudar enkontro dahuluk ho diresaun finansas, Diresaun Planeamentu Aprovizionamentu hodi aprezenta panorama ezekusaun orsamentu Jeral Estadu (OJE) 2026 nian ne’ebe Parlementu nasional aloka ba RAEOA.

Interinu ne’e informa, objetivu husi enkontro dahuluk ne’e, atu halo aprezentasaun kona-ba Planu Asaun Annual (PAA), no orsamentu narativu inklui planu aprovizionamentu 2026 nian.

“aprezentasaun ne’e hau bele apar didi’ak kona-ba orsamentu ne’ebe aloka mai RAEOA, no osan ne’e exekuta ba atividade saida, nune’e hau apar didi’ak, atu define didi’ak ida ne’ebe mak kategoria despeza regular rutina, bele halo jestaun ho di’ak, hodi prepara ba faze ezekusaun” nia informa hafoen remata enkontro dahuluk iha salaun Gabinete ZEEDOA oebau ohin.

Nia akresenta katak, enkontro ne’e seidauk konklui no sei kontinua filafali iha sabado semana ne’e, atu haree fali Rezultadu implementasaun planu asaun ba futuru, nune’e bele loke ona prosesu aprovizionamentu liuliu ba despeza ho kategoria regular, hanesan; manutensaun edifisiu, Karreta, fornesementu konbustivel no seluktan ho .

“ida ne’e tenke haree sai preoridade, nune’e fasilita aprovizionamentu atu bele loke prosesu, tuir regra rejime aprovizionamentu nian, nia esplika”

Iha fatin hanesan, Direitor Jeral rejiaun oekusi Domingos Punef, konsidera enkontro dahuluk ne’e impportante atu tau matan ba prosesu ezekusaun Orsamentu Jeral Estadu (OJE) 2026 nian ba RAEOA.

“enkontro ne’e atu haree prosesu orsamentu iha Diresaun planeimantu no finansa, haree ba forsa traballu nia osan, no kada item ne’ebe integra iha aprovizionamentu, ita tenke kontrola beibeik, no ezekuta lalais, kada trimestre tenke hetan pursentu ne’ebe detemina ona iha lei ezekusaun Orsamental, tanba ne’e tama ona ba trimestre daruak, nia heteten”

Reportagen Jornalista Media RCAL