MetroFM-RCL; Ministériu Finansa (MF) liuhusi departamentu Unidade Komunikasaun no Relasaun Públika (UCRP sigla portugés), tersa feira (26/08/2025) ne’e hala’o enkontru kona-ba servisu MF nian ba autoridade munisipál Lautem, hodi kria relasaun di’ak ho rádiu komunidade (RAKOM) hotu atu bele divulga informasaun ministériu nian liuhusi rádiu sira.
Tékniku profisionál administrasaun finansa UCRP husi MF Milenio Ribeiro Henriques hateten, objetivu husi enkontru ne’e atu divulga informasaun kona-ba lala’ok servisu nian iha MF ba autoridade munisipál sira, hodi hakle’an oinsá servisu iha parte finansa nian iha ministériu refere.
“Ami mai husi unidade ida naran unidade komunikasaun, unidade ne’e atu jere publikasaun no divulga informasaun kona-ba lala’ok ministériu finansas nian, ami mai koordena no halo relasaun di’ak ho rádiu komunidade sira iha munisípiu sira ami mai koordena hodi nune’e atividade sira husi ministériu finansas nian rádiu komunidade sira bele publika ba komunidade sira kona-ba servisu ministériu nian”, dehan Milenio.
Tuir nia, liuhusi enkontru ida ne’e mós atu halo kooperasaun servisu ne’ebé di’ak ba entidade sira hotu hodi partilla informasaun liuhusi kanál komunikasaun sira iha Lautem.
Sorin seluk xefe Institutu Nasionál Estatístika munisípiu Lautem Marfino Pereira relata, sorumutu ida ne’e importante tebes ba sira nu’udar funsionáriu estatístika hodi hatene servisu finansa nian, tanba durante ne’e autoridade sira iha munisípiu refere kolabora di’ak ho estatístika hanesan rekolla informasaun sira.
“Servisu estatístika munisípiu Lautem ne’ebé reprezenta governu sentrál iha munisípiu Lautem ami-nia knaar no responsabilidade ida mak rekolla dadus, tanba ne’e ami servisu hamutuk ho entidade sira hotu entermus informasaun ami persiza servisu hamutuk inklui mós xefe suku no xefe aldeia sira”, hateten Marfino.
Entretantu ministériu finansa liuhusi departamentu UCRP hala’o enkontru ho funsionáriu estatístika Lautem, autoridade munisipál Lautem, sekretáriu munisipál administrasaun no finansa iha administrasaun munisípiu Lautem.
Hakerek testu : Castro/Nito Soares
Editora : Ana
Fonte Notísia : https://metrofm.tl/mf-servisu-hamutuk-ho-rakom-sira-iha-teritoriu-tl/
Leave a Reply