RCAL-Oekusi, 03 Fevreiru 2026; Prezidente Autoridade Rejiaun Administrativa Espesiál Oecusse Ambeno (RAEOA), Regiu da Cruz Salu, deklara asuntu ne’e iha atividade Sensibilzasaun koperativa peskador Oekusi-Ambeno nebe realiza segunda ne’e 02/02/2026 iha Sentru Lotas Peska Oesono, Suku Costa, Sub-Rejiaun Pante-Makassar, Rejiaun Administrativa Espesiál Oecusse Ambeno.
PA Regio da Cruz salu hateten liu husi organizasaun koletiva, Governu prepara hela Movimentu Empreendedorizmu Oecusse, ne’ebé sei fó apoio ba kooperativa peskas ho fundu, aset no asisténsia teknika ho intensaun atu hametin setór peskas iha Oecusse no apoio kooperativa, ho fó énfaze ba apoio tekniku, jestaun aset no kapasidade peskador sira,
Prezidente Autoridade RAEOA hateten Apoiu ida nee la’ós ba interese pessoal, maibé atu hametin organizasaun koletivu, hadia produsaun no garante sustenabilidade setór peskas.
Líder máximu RAEOA nee hatutan katak objetivu prinsipál programa nee atu harii sentru integradu peskas iha nivel rejiaun no sentru integradu peskas nee sei operadu husi kooperativa peskas, ne’ebé sei sai tulun ida atu hadia valor ekonomiku ikan, hamenus perdas produsaun no aumenta rendimentu peskador sira.
PA-RAEOA mos subliña katak peskador sira hotu iha Oecusse tenke tama iha kooperativa, halo pendataan, identifikasaun aset peskas, no organiza grupu tuir tipu kaer ikan. Governu sei apoia kooperativa peskas atu halibur produtu ikan, organiza sistema negósiu ne’ebé klaru no fó prioridade ba produtu lokal.
Xefe Suku Costa husu ba departamentu relevante atu prepara planu formasaun ne’ebé klaru no kontinu, atu peskador sira bele uza ekipamentu governu ho di’ak, ho konesimentu tekniku no ho responsabilidade. Nia hateten katak balun peskador seidauk iha konesimentu adekuadu kona-ba tempu musiman ikan no téknika kaer ikan ne’ebé loos, ne’ebé halo ikan barak estraga tanba laiha fatin armazenamentu adekuadu.
“Maski Oecusse hela iha tasi ibun, maibé iha tempu balu ema buka ikan mos araska, Nee tanba falta konhesimentu no formasaun,” dehan Francisco Colo.
Entretantu, Peskador Mateus Falo husi Suku Lifau, hateten programa kooperativa peskas nee di’ak tanba bele ajuda hamenus problema peskador sira. Maibé nia rekoñese katak iha desafio barak, liuliu falta fatin permanente atu rai ikan tanba Bainhira produzaun sai barak, ikan barak estraga tanba laiha sistema armazenamentu ne’ebé di’ak.
Reportagen Jornalista media RCAL
Leave a Reply