OEKUSI RCAL 29 Juñu 2026 – Governo liuhosi Ministériu Interior, Diresaun Nasionál Seguransa Rodoviaria (DNSR), servisu hamutuk ho Diresaun Nasionál Transporte no Terestre Oékusi Ambeno no Polísia Nasionál Timor-Leste Oe-kusi Segunda ne’e Sosializa materia Seguransa rodaviaria ba Estudante iha Eskola Sekundáriu Geral Publika Palaban Oe-kusi.
Diretor Jeral Asuntu Seguransa Prevensaun Konflitu iha Ministeriu Interior, Gaspar Pereira de Sousa hatete, sensibilizasaun ne’e foku liu ba Estudante sira, atu oinsa bele utliliza transporte iha estrada publiku ho di’ak. Nune’e evita problema ba dezastre nian, ne’ebe maka lor-loron akontese no mosu iha rai laran, tanba ne’e, parte DNSR hamutuk ho DNTT, no Polisia Tranzitu tuun direita atu halo sosializasaun ba Estudante sira iha Palaban Oe-kusi ne’e, hodi bele komprende diak liutan.
“Atividade be’e hala’o tanba Ministériu Interior liuhusi Diresaun Nasionál Seguransa Rodoviaria (DNSR), servisu hamutuk ho parte relevante hanesan DNTT, PNTL liuhusi Polísia Tranzitu hodi halo atividade sensibilizasaun ba Estudante sira entaun, ita halo” informa Gaspar Pereira de Sousa ba Jornalista sira iha ESG Palaban, Segunda (29/06).
Nia Esplika, Materia ne’ebe maka fo ba Estudante sira hanesan sinais tranzitu, kodigu estrada, no imprimu sim ho nia regras sira. Nune’e sira uza transporte karik tuir ninia regras, hodi labele prezudika sira ba iha estrada klaran.
“dala barak hau haree, Alin Estudante sira barak liu maka hetan dezastre iha estrada klaran. Ida ne’e tanba sira ladun hatene no intende regras ba uza transporte ho didi’ak” nia esplika.
Iha fatin hanesan, reprezenta komandante PNTL Oékusi, superintendente asistente polisía Belarmino Da Rosa, hatete estudante sira ho idade produtivu sempre kontra regras rodoaviariu nian, tanba ne’e ekipa konjunta sei kontrola sidadaun ho estudante sira tenke kumpre regra rodoaviariu inklui dokumentu hanesan karta kondusaun, inspesaun kareta no motor nian.
Diretor Eskola Ensinu Sekundáriu Geral Palaban, Juvinal da Cruz Salu sente orgullu, tanba iha ESG Palaban hetan ekipa husi Nasionál, partilla informasaun ba Estudante sira, kona-ba prevene seguransa rodoviaria, ne’ebe, ida ne’e sente importante tebes ba Estudante sira atu evita asidente iha futuru.
“Ha’u hanoin, ida ne’e oportunidade ida ne’ebe maka di’ak, liu-liu ba foinsae sira ho idade produtivu. Tanba iha situasaun real hanesan ita hotu haree no akompaña iha Sosiedade no dalan publiku, labarik idade produtivu maka sempre akuza no hasoru situasaun ba ida ne’e. Maibe liuhusi sensibilizasaun sira bele intende no Komprende ona”, nia hateten.
Reportagen Jornalista Media RCAL Julmira Cab Colo
Editor Joe Feno
Leave a Reply