RCAL 20112025_Ponte Noefefan nebe lokaliza iha suku Lifau Sub-rejiuan pante-Makassar ne’ebe konstrui ho Orsamentu Jeral (OJE) hamutuk, Millaun $17,5, husi antigu Presidente Autoridade Rejiaun Administrativa Espesial Oe-Kussi Ambeno (RAEOA Mari Bin Amudi Alkatiri; dadaun ne’e ahi la-lakan ona tanba ema deskuñesidu ho laran aat sobu no estraga fiu sira nebe monta hodi halakan no hafurak ponte ne’e iha tempu kalan.
Xefe departementu Eletrisidade de Timor-Leste (EDTL) Rejiaun Administrativa Espesial oekusi Ambeno (RAEOA) Antáo Cabal, hateten, ahi iha ponte ne’e la-lakan tanba ema deskunesidu estraga fiu liña eletrika no tda rahun ahi sira nune’e labele lakan iha oras kalan koaze fulan tolu ona konta husi fulan Setembro mai to’o fulan Novembro ne’e.
“Iluminasaun liña distribuisaun atu fornese enerjia ba ponte Noefefan ema deskoñesidu komesa sobu no destroi ita nia fiu andedoon ne’ebe ita instala iha ponte, ne’e maka afeita durante fulan tolu ona labele lakan iha tempu kalan, tanba bola lampu mos sira tuda rahun hotu”
Xefe departementu ne’e informa katak, atu solusiaona problema ne’e, parte EDTL simu ona orientasaun husi presidente Autoridade rejiaun Administrativa Espesial Oekusi Ambeno, atu hadia liuhosi politika Konsellu Administrasaun fundu infraestrutura (KAFI) nian, maibe antes ne’e suspendidu ona husi autoridade sesante.
“entaun ekipa EDTLsei esforsu tuir ita nia kondisaun ne’ebe iha, atu ativa fila-fali iluminasaun sira iha ponte Noefefan, maibe depende husi ita-nia kondisaun husi EDTL”.
Nune’e nia parte kompremetidu atu kordena ho autoridade lokal sira iha suku Lifau, karik iha dadus balu sei uja hanesan evidensia nune’e bele prosesa, tanba estragu ba fiu lobul tesik nian ho distansia metro lima, afeita total ba ponte tomak labele fo naroman iha tempu kalan.
Liga ho asuntu ne’e, xefe do suku Lifau delfino Sole, rekonese katak iluminasaun liña eletrika iha ponte Noefefan la funsiona koaze fulan tolu, no nia parte la rekoñese nia kauza prinsipal.
“ita lahetene semak tesi no estraga, maibe loos, kuandu ita liuhusi ponte Noefefan ho tempu kalan ahi la-lakan fulan tolu ona, tanba fatin ne’e publiku no la-iha seguransa hau labele indika ema ida, ne’ebe ita sei rezolve no kontinua fó seguransa hodi haree hamutuk”.
Reportagen jornalista RCAL
Leave a Reply