Pantemakasar (RCAL) 13 outubro 2026 – Komandante Polísia Nasionál Timor-Leste (PNTL) Rejiaun Administrativa Espesiál Oékusi Ambeno (RAEOA), Superintendente Xefe Nicolau Francelino da Costa, esprime nia tristesa kbiit-laek nian tanba hahalok funsionáriu administrativu públiku balu ne’ebé kontinua hatudu la pontualidade iha serbisu.
Asuntu ne’e nia fakar sai iha nia diskursu, bainhira marka prezensa iha abertura ba Selesaun no Eleisaun Parlamentu Foinsa’e, ne’ebé hala’o iha Salaun SRE. RAEOA.
“Hau triste tanba partisipante sira ladun tau atensaun másimu no la fó prioridade ba eventu refere tanba, eventu ne’e importante tebes no programa rasik hosi Governu, liuhosi Ministériu Juventude, Desportu, Arte no Cultura (MJDAC),” dehan Komandante Nicolau.
Nia haktuir katak fuan-moris hodi hato’o krítika nakloke ne’e la’ós atu hatún se-se de’it, maibé hanesan esforsu ida atu hadi’a kualidade rekurso umanu hodi nune’e bele dezenvolve nasaun, liuliu iha situasaun ne’ebé Timor-Leste besik ona atu sai uma-na’in ba simeira ASEAN nian.
“Ita tama ona iha ASEAN, no lakleur tan Timor-Leste sei sai uma-na’in ba ASEAN ne’ebé sei realiza iha tinan rua mai tan. Maibé, oinsá ita atu kompete ho ema seluk karik ita rasik la kumpre oras? Sei susar mai ita atu manan ema seluk,” nia kestiona.
Komandante ne’e mós lere katak kazu la kumpre oras ne’e la’ós foin akontese, maibé sai ona hanesan moras ida ne’ebé mosu beibeik iha enkontru oioin iha Oékusi, inklui hosi parte lideransa sira.
“Iha enkontru ruma, sempre akontese ema boot sira mak mai tarde. Ita krítika atu hadi’a, la’ós atu estraka. Se akontese dala ida ita bele komprende no perdua, maibé ida ne’e demais fali ona. Ita ladun konsistente ho oras ne’ebé fó sai ona iha konvite,” nia hateten ho laran-triste.
Nia fó hanoin katak, konvidadu nasionál no internasionál sira ne’ebé mai la’ós atu haree de’it ba kualidade relatóriu ka ‘skripsi’, maibé sira mós sukat badinas no lala’ok pontualidade nian. Hosi buat ki’ik hanesan ne’e mak ema sei avalia oinsá ita organiza ita-nia an.
“Nudar Komandante PNTL, ami ne’e treinadu no formadu hamutuk ho fórsa Armadas F-FDTL. Kuandu ami simu konvite, ami foka liu atu partisipa tuir oras ne’ebé hakerek ona iha karta. Estudante sira tau fiar ba ita atu akompaña sira, se ita la marka prezensa, oinsá ho sira nia sentimentu?” nia dehan.
Iha fatin hanesan, Xefe Suku Costa, Francisco Colo, mós apoia no konfirma kestaun ne’e. Tuir nia, pontualidade ne’e liga mós ba pesoalidade no báziku morál hosi ema idak-idak nian.
“Ita presiza komprende lianfuan pontualidade ne’e. Karik nu’udar funsionáriu administrativu públiku ida kuandu komprende ona, konserteza ita bele respeita oras wainhira tama serbisu ho oras no sai mós ho oras.
Observasaun hosi Komandu PNTL ne’e loos tebes, tanba dalabarak ita la respeita duni oras ne’ebé hatene ona iha karta konvite,” dehan Francisco Colo.
Xefe Suku ne’e mós salienta katak ba nia rasik nu’udar xefe komunidade, laiha oras ne’ebé termina ba nia serbisu, maski laiha kartaun absénsia hosi governu, maibé responsabilidade no morál nu’udar baze prinsipál hodi serbí komunidade iha área laran.
Reportagen Julmira Cab Colo
