PANTEMAKASAR, 12 OUTOBRU 2026 (RCAL) – Governu liuhusi Ministériu da Juventude, Desportu, Arte no Kultura (MJDK), segunda ne’e aprezenta prosesu rekrutamentu parlementu Foin sa’e periodu VI tinan 2027-2029 ba estudante no professores iha salaun SRE Oekusi.
Xefe Departamentu Jestaun Patrimóniu no Lojístika, José António Borges Guterres, hateten, Programa nasionál ne’ebé kobre munisípiu hotu ne’e, ho objetivu atu dezenvolve kapasidade juventude nian, tanba tuir alterasaun daruak, totál membru Parlamentu Foinsa’e nian hamutuk na’in 142, ne’ebé inklui mós foti-an na’in rua (2) ho defisiénsia husi postu administrativu sira hotu.
Xefef departementu ne’e dehan, Kritériu ba estudante sira ne’ebé atu kompete mak hanesan:
• Sidadaun Timorense ho idade tinan 12 to’o 17;
• Fotokópia BI ka Sertidaun RDTL no dokumentu legál relijiaun nian;
• Hela iha Postu Administrativu lokál;
• Fotokópia BI/Sertidaun RDTL no Kartaun Eleitorál inan-aman nian;
• La asume kargu iha partidu polítiku;
• Karta deklarasaun husi Suku no Atestadu Médiku (opsionál).
José António Borges Guterres, afirma katak programa kadernizasaun ne’ebé hahú duni husi tinan 2009 ne’e, prepara lideransa futuru nian liuhusi koñesimentu kona-ba debate públiku no diskusaun, kobre mos ho Serbisu faze rejistrasaun, selesaun, to’o eleisaun hodi determina sé mak merese sai membru.
Biban ne’e, Komandante Polísia Nasionál Timor-Leste (PNTL) Rejionál Oékusi, Superintendente Nicolau Francelino da Costa, hato’o agradesimentu ba estudante sira ne’ebé laran-metin atu kandidata an, tanba futuru nasaun nian iha foinsa’e sira-nia liman.
Entertantu, Xefe Suku Costa, Francisco Colo, konsidera, atividade ne’e pozitivu tebes tanba Governu presiza halibur no organiza foinsa’e sira atu dezenvolve sira-nia kapasidade, hodi komprende liután kona-ba demokrasia no lideransa ba futuru.
Atividade Parlamentu Foinsa’e ne’e realiza iha territóriu nasionál, kobre munisípiu hotu no kada postu administrativu.
Reportagen Julmira Cab Colo
