PANTEMAKASSAR, 13 Outubru 2026 (RCAL) –, esplika ba jornalista sira katak empreza Timor-Lorosa’e ne’ebé hahú implementa projetu estrada husi Noel-Ekat Oesilo ba Postu Pasabe iha tinan 2024, to’o agora sedauk finaliza.
Remigio Nuno Sila hateten, Obras Públika simu ona reklamasaun lubuk ida husi lideransa suku, parte igreja, no autoridade lokal, liuliu Xefe Postu Pasabe, kona-ba kualidade implementasaun projetu ne’e seidauk finaliza too’o ohin laran. Tan ne’e, Obras Públika fo ona rekomendasaun ba empreza Timor-Lorosa’e atu hadi’a kualidade servisu hodi tuir estandarte padraun estrada nian.
Hadi’a estrada ne’e sai mós prioridade bazeia ba deliberasaun Autoridade nian iha semana kotuk, hodi prepara ba selebrasau Eventu Nasional Loron Aniversariu Proklamasaun Ukun Rasik An, 28 Novembru 2026.
Diretor ne’e rekoñese katak iha dezafiu iha terrenu, liuliu kona-ba ke’e drenajen. Atuálmente, iha empreza rua mak ezekuta hela obra ne’e, maibé sira uza de’it ekipamentu husi kompana ida. Kondisaun ne’e difikulta sira atu halo separasaun serbisu.
“Agora sira nia serbisu la’o hela husi Hauana ba Tumin. Sira kontinua ateru, taka kuak sira, hamos, no ke’e drenajen. Nune’e, kuandu tempu udan mai, bee bele sulin tuir nia dalan no la fó impaktu hodi sulin fali iha estrada klaran hanesan tinan-tinan,” dehan Remigio.
Hatan konfirmasaun Kona-ba planeamentu ba futuru, Remigio esplika katak tanba ne’e kategoria estrada rejional, sira sei la tau ‘palanpun’ (provizoriu), maibé sei aplika estrada definitivu ho asfaltu. Planu ne’e hatama ona iha narativa tinan 2027.
“Ita espera hetan aprovasaun iha tinan ne’e, nune’e tinan oin ita bele implementa. Maibé, ida ne’e depende ba polítika Governu liuhusi Ministériu Obras Públika. Tanba agora dadauk, orsamentu aloka ba Fundu Espesiál Dezemvolvimento (FED) mak sei jere osan hodi bele implementa dezenvolvimentu boot sira iha RAEOA,” nia konklui.
Reportagen Julmira Cab Colo
