Oekusi 12 Marsu 2026 (RCAL); Presidente Autoridade Rejiaun Administrativa Espesial Oekusi Ambeno Regio da Cruz Salu, hateten, kinta feira ne’e, Autoridade entrega ona karta informativa ba funsionariu kontratadu no termo-sertu sira hamutuk nain-1.597 atu hapara kontratu iha loron 31 fulan marsu tinan 2026.
PA Regio da Cruz Salu esplika katak, Karta atu termina kontratu ne’e bazea ba orientasaun husi Komisaun funsaun Publika (KFP). Nune’e, husi funsionariu 1.597 ne’e kobre ba diresaun hotuhotu iha RAEOA maibe iha deit diresaun tolu hanesan Rejional Saude, Edukasaun, no EDTL mak nesesariu atu kontinua manten.
Regiu dehan, karta ofisial husi governu sentral, liuhosi entidade tutelada superintendente RAEOA, Primeiru-Ministrum (PM) kay Rala Xanana Gusmau, entrega ona karta ba autoridade Tranzitorio RAEOA iha fevereiro 2026.
Iha karta ofisial ne’e, informa kona-ba sesa (hakotu) periodo tranzitoriu ba estrutura atual no sesa mos kontratu termu sertu iha RAEOA iha loron 31 de Marsu 2026 ne’e, tantu termu-sertu ba asistensia tekniku Internasional no Nasional.
“komesa semana kotuk, horseik to’o ohin, funsionariu term-sertu balun simu ona karta atu hapara kontratu. Hau tenke enkoraza nafatin, ita tenke kumpre, dezde loron 01 setembru 2025, depoes ami fila husi Dili, iha ezersisiu atu koñese, buka hatene komprende kontextu agora, nesesidade kona-ba traballu iha RAEOA” Regiu hatete ba jornalista iha salaun Alfandega palaban.
Fo hanoin fali katak, tuir dadus ne’ebe RCAL asesu iha direitur Jeral Oekusi, katak total funsionariu iha oekusi hamutuk 2.842, no husi ne’e funsionariu permanente nain-1.245.
Ho nune’e funsionariu nain-1.597 mayoria kontratadu kategoria termu sertu kompostu husi nomeasaun politika nain rua (2), funsionariu ajente administrasaun nain-1.284, funsionariu kontratadu na’in-250, asistensia teknika Nasional na’in-44, asesor nasional na’in-ualu (8) no asesor Intenasional na’in sia (9).
Reportagen jornalista media RCAL
Leave a Reply