Pantemakassar (RCAL 23 Outubro 2026) – Sekretáriu Estadu Peska, hamutuk ho MJDAC, WorldFish, no Sentru Joventude Oe-Cusse, lansa programa formasaun ba foin-sa’e sira iha RAEOA.
Programa ne’e ho objetivu atu hametin koñesimentu joven sira nian kona-ba peska ne’ebé reziliente ba mudansa klimátika no kuidadu biodiversidade tasi nian.
Formasaun ne’ebé realiza durante loron tolu ne’e, hanesan pasu ida atu eduka no motiva jerasaun foun sira atu involve an substitui peskadór tuan sira ne’ebé idade avansadu ona.
Sekretáriu Estadu Peska, Domingos da Conceição dos Santos, hateten katak foin-sa’e sira presiza hatene dezafiu ne’ebé tasi hasoru, liuliu menus tiha kobertura ai-parapa husi hektare nain-atof-sia ba de’it nain-atof-hitu tanba pesti no asaun estragu husi ema. Sira mós presiza hatene uza ekipamentu ne’ebé loos no labele kaer ikan ne’ebé protejidu.
Nia haktuir katak povu no nasaun de’it mak hela metin, nu’udar obrigasaun atu kuidadu riku-soin tasi nian ba futuru.
“Ita presiza duni envia informasaun no partilha esperiénsia… atu preserva jerasaun tuir mai… Komunidade sira aproveita didiak ita nia riku soin no responsabiliza…”
Iha fatin hanesan, Direjente Nasionál Joventude, Florindo Napoleon do Santos Xavier, fó sai katak formasaun ne’e nakloke ba joven mane, feto, no mós maluk sira ho defisiensia.
Dirijente ne’e, enkoraja ba foin-sa’e sira atu badinas, nune’e bele sai peskadór nasionál ne’ebé profesionál no kria dezenvolvimentu ekonómiku.
Biban ne’e, Xefe Suku Costa, Francisco Colo, mós husu ba populasaun hotu iha área kosteira atu labele soe foer arbiru iha tasi no lagoa sira, no nafatin kuidadu ahu-ruin sira. Ba oin, sei implementa mós lei tara-bandu hodi proteje tasi ne’ebé sai hanesan to’os ba komunidade nian.
Julmira Cab Colo
