Oe-Cusse RCAL 17 Juñu 2026 – Koordenador Sesante INSS-RAEOA Teotonio Tolan, fo sai deklarasaun ne’e bainhira entrega Serbisu patrimonia Estadu ba Institutu Nasional Seguransa Sosial (INSS) Departementu serbisu deskonsentradus Koarta ne’e 17 Juñu 2026 iha Edifisiu INSS Santa Rosa Oecusse Suku Costa Sub-Rejiaun Pantemakassar.
Koordenador Sesante INSS-RAEOA, Teotonio Tolan dehan, relasiona ho publikasaun atividades hand Over ka termu entrega kargu serbisu, husi Koordenador INSS Sesante ba Koordenador INSS atual, maibe labele akontese hand Over tanba iha mis komunikasaun.
“Hau haree hand Over foin lalais nee labele akontese, tanba mis koordenasaun entre hau ho INSS Nasional nomos kolega neebe maka atu substitui hau, ida nee la iha komunikasaun diak. Ema iha publiku hateten katak administrasaun ladun lao, ida nee laloos, administrasaun kontinua lao maibe nomeadu koordenador foun sedauk lori karta ida, husi hau nia pensamentu hanoin katak, dala ruma bele akontese failhansu ema mai koalia ho ibun deit mos o fo deit, signifika laos ego, laos lakohi tun husi kargu koordenador, depois ema boot balun telephone mai dehan nia lakohi atu tun karik, laos lakohi tun, hau nee serbisu nanis, serbisu iha Sosial hanesan funsionariu publiku iha MSSI iha tinan 2005, kompleta ona hau nia serbisu 22 anos serbisu iha sosial,” dehan Teotonio.
Nia dehan, kargu nee ba ema hotu no kargu nee tau hela iha bolsu, loron ida ema atu hetan konfiansa karik, foti entrega kargu nee, labele tau iha fuan, tanba nee laos eransa husi avo sira, nee eransa nasaun nian.
“Karik Publiku nota karik, husi parte neebe maka sala, ita la fo kulpa ba malu, maibe ita atu haloos deit administrativamente ninia lalaok, regras prosedimentu legal, sira nee iha serbisu administrasaun nian, politika lao ketak, maibe sei politika lao sala mos administrasaun mos lao laloos, maibe hau sei nafatin kontribui ho hau nia kolega funsionariu sira tanba ami toman malu ona”.
Iha ambitu seremonia entrega servisu ne’e, Diretor Departementu serbisu Deskonsentradus reprezenta INSS Nasional Marvão Verdial Campos hateten, instituisaun saida deit mak ninia koordenador termina ninia serbisu, outomatikamente tenke entrega servisu nudar patrimonio estadu ba Kargu atual nune’e bele fo kontinuasaun servisu ba povu nia moris diak.
Hatan konfirmasaun kona ba Koordenador Sesante INSS RAEOA ne’ebe iha semana kotuk bainhira entrega serbisu laiha baze legal ba kargu nomeasaun husi INSS-RAEOA hamosu tristeza katak, ida nee kestaun dezentendimentu husi parte koordenador Sesante, inklui ho tekniku sira iha INSS-RAEOA.
“Normalmente kuandu halo hand Over ida, otomatikamente tenke hand over ba koordenador nomeadu neebe maka hetan despaixu legalmente, maka foin halo hand Over, ba ita nia koordenador foun nee neebe hetan nomeasaun husi Nasional maibe too ikus sedauk hetan koordenador atual neebe maka hetan despaixu, tanba nee maka hau haree atividades hand over semana kotuk nee, la formal no la iha koordenasaun husi Koordenador Sesante INSS-RAEOA ho parte INSS Nasional,
Tanba nee Diretor Departementu serbisu Deskonsentradus husu atu halo fali serimonia foun para entrega serbisu nee ba INSS Nasional,” dehan Marvão ba RCAL iha Edifisiu INSS-RAEOA, Santa Rosa Oecusse.
Nia haktuir tan katak, Koordenador Sesante INSS-RAEOA hanesan Funsionariu Permanente Ministeriu Solidade sosial no Inkluzaun (MSSI), tinan rua liu ba husu atu destaka mai iha parte INSS, tanba nee bain hira nia ses, funsaun neebe nia tutela iha MSSI, sira nia serbisu hanesan serbisu ba asuntu sosiais hotu, tanba nee maske nia la iha ona, maibe nia nafatin presta ninia serbisu nafatin iha asuntu sosiais sira hanesan INSS halo.
“Hau hanoin, antes nia termina ninia kargu, nia nafatin serbisu koordenasaun diak tebes ho parte nasional, hau fiar katak sei kolabora nafatin hodi asegura serbisu iha MSSI iha Oecusse, ho serbisu integradu hare ba asuntu prestasaun serbisu, hare ba ferik no katuas sira,” dehan nia.
Reportagen Jornalista Julmira Cab Colo
Leave a Reply