Pantemakar (RCAL, 30 Setembru 2026) – Prezidente Autoridade Rejiaun Administrativa Espesial Oe-Cusse Ambeno (RAEOA), Régio da Cruz Salu, hamutuk ho Diretór Servisu Rejional Seguransa Alimentar, André Lao, hala’o enkontru koordenasaun ho diresaun sira no parseiru dezenvolvimentu iha enklave Oe-Cusse.
Enkontru ne’e ho objetivu atu halo harmonizasaun ba asuntu asosiasaun no serbisu ekipa integradu nian iha RAEOA.
Prezidente Autoridade RAEOA, Régio da Cruz Salu, dehan, enkntro ne’e fa parte harmonizasaun maibe kategoria importante tebes tanba problema prinsipál iha Timor-Leste mak kona-ba kestaun asesu, disponibilidade, seguransa alimentar, no nutrisaun, nune’e atu defini harmonizasaun ne’e, presiza halo uluk mapeamentu hodi haree ba situasaun reál iha Oe-Cusse.
Biban ne’e, Diretór Servisu Rejional Seguransa Alimentar, André Lao, informa katak enkontru koordenasaun ne’e involve mós Diretór Asaun Sosiál, Saúde, Edukasaun, Protesaun Sivíl, AIFAESA, no parseiru dezenvolvimentu, Serbisu integradu sira iha RAEOA.
André Lao dehan, Diresaun Servisu Rejional Seguransa Alimentar foin estabelese iha fulan Abríl liubá, no foin la’o durante fulan haat. Maski nune’e, sira iha ona planu atu integra programa sira ba tinan oin.
Andre La’o esplika, Programa ne’ebé foin hahú ohin ne’e inklui atividade xave haat, hanesan: sensibilizasaun, monitorizasaun, avaliasaun, no serbisu hamutuk ho setór edukasaun no saúde kona-ba seguransa alimentar no nutrisaun.
Kona-ba ai-han, Oe-Cusse dependente ba ai-han lokál no mós ai-han importadu. Tan ne’e, AIFAESA hala’o ona inspesaun ba produtu lokál no internasionál sira ne’ebé fa’an iha loja sira.
Diretór Servisu Rejional Seguransa Alimentar, ne’e mos klarifika katak, Enkontru ne’e mós ho objetivu atu estabelese komisaun ida hodi prepara grupu ekonómiku sira ne’ebé sei reprezenta Oe-Cusse iha selebrasaun Loron Mundiál Ai-han iha Dili, no mós ba Serimónia 28 de Novembru nian ne’ebé sei realiza iha Sub-rejiaun Pássabe.
Iha selebrasaun Loron Mundiál Ai-han, sei iha atividade boot haat, hanesan: feira produtu lokál, semináriu, sertame (kompetisaun), no kulinária. Kompetisaun kulinária iha tinan ne’e sei iha mudansa ou modifikasaun, tanba sei involve direita husi Estudante eskola Ensinu Báziku Sentrál ba kompetisaun Sertame.
Reportagen Julmira Cab Colo
