Pantemakassar (RCAL 02 Outobru 2026) – Komemorasaun Loron Turizmu Mundial iha Rejiaun Espesial Oecusse-Ambeno la’o ho susesu, maske atrasadu uitoan. Serbisu Rejional Jestaun Merkadu no Turizmu RAEOA, sesta ne’e, realiza selebrasaun ne’e iha Lifau, liuhosi atividade limpeza jerál hodi hamosu konsiénsia ambientál.
Maske loron mundiál turizmu monu iha loron 27 Setembru liubá, Serbisu Rejional Jestaun Merkadu no Turizmu foin realiza fali komemorasaun ne’e iha sesta-feira, 2 Outubru 2026. Atividade ne’e foka liu ba limpeza jerál iha Fatin Istóriku Jardim Lifau, ho tema “Turizmu ba Mundu ho Teknolojia no kuida sitiu Turistiku iha RAEOA”.
Diretora Serbisu Rejional, Anastasia Eni, esklarese katak mudansa loron ne’e la hamenus espíritu atu kuida ambiente, tanba turizmu labele separa husi naturezu, kultura, no istória.
“Tuir loloos ita komemora loron ida-ne’e iha tempu ne’ebá, maibé ita kansela no muda mai fali… Ohin ita mai iha ne’e tanba hadomi ita-nia ambiente. Bainhira ita ko’alia kona-ba Turizmu, ne’e ita ko’alia ba Relijiozu, istóriku, kultura, no Turizmu ambiente ou natureza.”
Iha fatin hanesan, Sekretáriu Rejional Administrasaun no Finansa, Salvador da Cruz, fó sai katak Governu RAEOA koloka turizmu nu’udar xave ekonómiku, inklui fó insentivu fiskal izensaun impostu to’o tinan 10 ba investidor estranjeiru sira.
Salvador mós rekoñese katak Jardim Lifau abandonadu kuaze tinan 11 ona, maibé agora governu sei hadi’a fali hodi simu Kongresu Edukasaun Ambientál CPLP. Kona-ba lixu iha Ponte Noefefan, Salvador dehan autoridade iha ona planu ba fatin lixu permanente.
Entertantu tuir pontu devista akadémiku, Vicente da Conceição Teme husi DITKREO, fó hanoin katak turizmu no teknolojia labele separa, no presiza dezenvolve ekoturizmu ho produtu lokál.
Tuir Tékniku Serbisu Turizmu, Nicolau Salvador Marques, ba jornalista informa katak, ba tinan 2027, governu preve ona orsamentu rihun 27 dolár kada fatin ba prioridade tolu: Tasi-ibun Sakato, Turizmu Relijiozu Pu’as, no Makelab área Bitunis.
Estudante João Batista Elo mós husu ba governu atu labele demora harii fatin lixu permanente hodi nune’e Pante Makasar bele moos no saúdavel.
Reportagen Julmira Cab Colo
