Pasabe (RCAL 02 Outubro 2026) – Xefe Suku Abani, Carlos Elo, husu ba Autoridade Rejiaun Administrativa Espesiál Oécusse-Ambeno (RAEOA) atu aselera kestaun tékniku ba konstrusaun Ponte Bankeko, tanba tempu udan besik ona, maibe obra ne’e seidauk la’o maske kompañia Vitoria hatún ona materiál balun iha fatin refere.
Carlos Elo husu mós ba komunikasaun sosiál atu konfirma prosesu ne’e ba autoridade kompetente. “Kompañia Vitoria hatún ona materiál hanesan kalikir ho rai-henek, maibé ha’u la hatene ninia prosesu ne’e tesi-to’o iha ne’ebé. Tempu besik atu udan ona, ami husu atu aselera ona. Nune’e, tempu udan karik, ninia porsentu dezenvolvimentu bele iha ona balun.”
Hatan ba kestaun ne’e, Presidente Autoridade RAEOA, Régio da Cruz Salu, esplika katak kontratu provizóriu ho Kompañia Vitoria asina ona hori-tinan. Atrazu ne’e akontese tanba Agência de Desenvolvimento Nacional (ADN) ho Obras Públikas sujere atu hadi’a fali dezenu fundasaun nian, hodi nune’e bele korta kustu tuir estudu tékniku.
Maske nune’e, Régio da Cruz Salu fó garantia katak kestaun tékniku sei rezolve lalais, no haktuir katak obra ne’e tenke finaliza ka remata iha fulan-Dezembru tinan ne’e.
Jornalista Julmira Cab Colo
