RCAL Oekussi, 1 junu 2026; sekretariu estadu igualdade ho institutu apoiu ba dezemvolvimentu emprezarial Segunda ne’e, fo treinamentu ba grupu benefisiariu rua nulu resin lima 25 konaba negosiu iha raeoa.
Diretora Nasional Dezemvolvimentu Igualdade Jeneru Olga da Costa Monteiro hateten; treinamentu ne’e atu kapasita grupu benefisiariu sira konaba planeiamentu/ atividade jestaun/ akontabilidade no kalkulasaun kustu inklui literasia iha finanseiru, nune’e grupu sira bele iha konhesimentu di’ak ba sira ninia negosiu.
Tanba ne’e husu ba partisipante sira tenke ativa iha treinamentu ne’e atu bele haklean liutan sira ninia konhesimentu kona ba negosiu, nune’e grupu benefisiariu sira bele iha susesu hosi fundu transferensia publika ho mekanismu hadulas ne’ebe mak apoiu hosi sekretariu estadu igualdade nian.
Diretor IADE RAEOA, Edmundu de Jesus Pereira hatete treinamentu ne’e atu hasa’e konhesimentu ba feto sira ne’ebe mak hala’o atividade negosiu, hodi bele halo jestaun di’ak ba sira ninia negosiu tanba grupu benefisiariu sira ne’e hetan fundu hosi orsamentu estadu nian nune’e presiza halo jestaun ho di’ak.
Biban ne’e Prezidente asosiasaun feto RAEOA Joana Bobo Tano hatete grupu benefisiariu sira ne’ebe mak partisipa iha treinamentu ne’e hetan fundu hosi sekretariu estadu igualdade iha tinan 2019 to’o 2025 nian ho maneira rotativa tanba fundu ne’e atu apoiu ba inan feto sira ne’ebe hala’o atividade negosiu maibe to’o tinan ida tenke entrega fila fali fundu ne ba grupu sira seluk.
Treinamentu ne’e organiza hosi sekretariu estadu igualdade ne’ebe mak parseria ho iade hodi fo treinamentu ba grupu benefisiariu rua nulu resin lima 25 no kada grupu reprezenta ema nain ida 1 inklui membru asosiasaun feto raeoa nain lima 5 hodi hasa’e konhesimentu ba negosiu nian durante loron haat iha oekusi ambeno.
Reportagen Julmira Cab Colo
Editor Joe Feno
Leave a Reply