Autoridade Munisipiu RAEOA ho Embaixadora Boa-Vontade Selebra Loron Mundial Labarik iha Oekusi.

RCAL Oekusi, 01 Juñu 2026; Embaixadora Boa-vontade ba Asuntu Edukasaun, Kirsty Sword Gusmão, Servisu hamutuk ho Autoridade Munisipiu Rejiaun Administrativa Espesial Oekusi Ambeno liuhosi Rejionál Edukasaun (SRE) Segunda ne’e 01 Junu 2026, komemora Loron Mundial Labarik iha Ensinu Bázika Filiál (EBF) 1.2. 30 de Agostu Masin, Suku Costa Sub-Rejiaun Pantemakassar.

Topiku ba Loron Mundial ne’e maka “Proteje Ami-nia Direitu, Garante Inkluzaun no Harii Futuru ne’ebé Di’ak”.

Iha eventu ne’e, Embaixadora Boa-vontade, Kirsty Sword Gusmão, hateten selebrasaun ne’e sai momentu relevante hodi hamutuk ho Ministériu Edukasaun no inan-aman sira atu kontinua valoriza labarik sira-nia direitu fundamental.

Molok remata Diskursu, Embaixadora Boa-vontade, Kirsty Sword Gusmão hato’o mensajen xave kona-ba importánsia labarik sira moris livre husi violénsia fízika no emosionál, no hetan edukasaun kualidade liuhusi lian ne’ebé sira komprende (lian materna).

“Papél manorin sira-nian iha edukasaun ne’e boot tebes, tanba kualidade edukasaun mós iha manorin sira-nia liman. Importante mós atu fó ezemplu di’ak ba labarik sira katak, rezolve problema tenke uza diálogu ho liafuan mamar, la’ós uza violénsia,”

Iha fatin hanesan Diretór SRE RAEOA, Vincêncio Cono, fo votus parabéns ba labarik sira hotu iha mundu, no liuliu iha Enklave Oé-cusse Ambeno ne’ebé nakonu ho talentu no laran-moos.

Cono afirma katak, data 1 de Juñu ne’e sai momentu fuan ba adultu sira-hanesan inan-aman, komunidade, no estadu, hodi hanoin-hetan fali sira-nia responsabilidade ba pilar tolu hanesan: Protexaun, Edukasaun, no Saúde.

“Ita tenke garante katak labarik hotu moris livre husi violénsia, hetan edukasaun ho siénsia ne’ebé kualidade, no hetan nutrisaun ne’ebé di’ak ba sira-nia saúde fízika no mentál. Seguru no domin iha uma-kain laran no sosiedade nia leet mak sai xave primeiru atu labarik sira bele hakat ba eskola ho ksolok,” dehan Vincêncio Cono.

Partisipa iha Eventu loron mundial ne’e, mai husi Jerente Mary MacKillop Today, Agustinha Ximenes Boavida, Komandante PNTL Oé-cusse Ambeno, Reprezentante INDICA, (profesór/a) sira, inan-aman, komunidade edukativa, no labarik sira husi kada eskola partensia Villa Oekusi.

Ekipa Kovertura Jornalista Media RCAL