Foto Hamutuk Presidente Autoridade RAEOA ho Bupati TTU Iha Fatin Bazar Kalan Palaban
Pante-Makassar (RCAL), 26 Setembru 2026 – Autoridade Rejiaun Administrativa Espesial Oe-cusse Ambeno (RAEOA), liuhosi Servisu Rejional Turismu no jestaun Merkadu, hamutuk ho Bupati Timur Tengah Utara (TTU) Kefamenanu, Yosep Falentinus Delasalle Kebo, sesta ne’e abertura bazar kalan iha Tasi Ibun Kiumaria, Suku Costa, Sub-rejiaun Pante-Makassar ho tema “Tempu Familia sira nian no Atu koñese ita nia Ekonómia Rasik”
Iha diskursu abertura ne’e, Presidente Autoridade RAEOA, Régio Servantes Romeia da Cruz Salu, konvida no apela, ba inan-aman, no mós kazál foun sira atu la bele hakmatek de’it iha uma, maibe lori família, hanesan feen, no oan sira hodi vizita, diverti malu, no han-hemu iha tasi ibun Kiumaria.
Presidente Régio da Cruz Salu mos husu ba empreendedor no vendedór sira atu fa’an hahán ho folin ne’ebé baratu no labele tula folin dolár ne’ebé karun tebes, nune’e komunidade hotu bele asesu.
Autoridade fundamenta katak, Bazaar Kalan ne’e rasik sei la’o kada semana dala rua, iha loron Sesta no Sábadu kalan, ho objetivu atu promove produtu lokál sira ne’ebé sai poténsia ba Oe-cusse, hodi nune’e bele dudu sirkulasaun ekonómia iha komunidade nia leet.
Iha fatin hanesan, Bupati TTU Kefamenanu, Yosep Falentinus Delasalle Kebo, hato’o agradesimentu boot ba konvite husi Autoridade RAEOA ho inisiatiava realiza Bazaar Kalan sai eventu ne’ebé “di’ak tebes” ka terbaik tanba nakonu ho produtu lokál ne’ebé riku.
Diretora Serbisu Rejionál Jestaun Merkadu no Turizmu (SRJMT), Anastasia Eni, esplika katak Bazaar Kalan ne’e sai espasu estratejiku ida atu promove produtu lokál hodi haforsa ekosistema ekonómia komunitária iha RAEOA no hein katak eventu ne’e sei fó biban boot ba empreendedor lokál sira hodi fa’an sira nia produtu, inklui mós hametin lasu relasaun sosiál no familiár iha sosiedade nia leet.
Atividade abertura bazar kalan ne’e hetan partisipasaun másimu husi Presidente Autoridade RAEOA, Bupati TTU ho nia ekipa, Diretóres Rejionais, Komandante PNTL RAEOA, komunidade lokál, inklui mós estudante sira.
