Pantemakassar (RCAL 29 Setembru 2026) – Rejiaun Administrativa Espesial Oe-Cusse Ambeno (RAEOA) prontu sai uma-nainba Enkontru Preparasaun ba Kongresu da-XIV nian no mós Kongresu Nasionál da-Sia ba Edukasaun Ambientál CPLP, ne’ebé sei selebrá iha tinan oin, 2027.
Eventu internasionál ne’e hetan apoiu boot husi Governu Sentral liuhusi desizaun Primeiru-Ministru Timor-Leste. Iha Enkontro Preparasaun daruak ne’e, representante Presidente Autoridade RAEOA, Atual Sekretária Rejionál Asuntu Sosiál, Merita Marques Lafo, afirma katak oportunidade ne’e hanesan honra boothodi, promove Timor-Leste ba mundu liuhusi Oe-Cusse. Merita Marques Lafo dehan, Nu’udar rai enklave ne’ebé besik ho nasaun viziñu Indonézia, hanesan Kupang noTTU, Oe-Cusse mós hakarak hatudu fali istória katak relasaun kulturál lisan nian sei metin nafatin maski moris iha nasaun ne’ebé diferente.
Sekretária Rejionál ne’e subliña katak atividade ne’e la’ós de’it ba dezenvolvimentu Oe-Cusse, maibé mós sai hakat-fatin hodi hatudu identidade no kultura Timor nian tomak, tanba mós sei iha partisipasaun husi distritu ka munisípiu seluk.
Iha fatin hanesan, Diretór Jerál Ambientu husi Nasionál, Domingos Mesquita, esplika katak enkontru preparasaun daruak ne’e, atu haforsa liután koordenasaun no avalia progresu sira. “Governu mós hamosu ona komisaun rua, hanesan Komisaun Nasionál no Komisaun Lokál, hodi organiza servisu lojístika, komunikasaun ho Sekretariadu CPLP, no foti mós liña orsamentu ba tinan oin mai”.Domingos Mesquita dehan, Eventu ne’e sei lori ema hamutuk besik atus-2 (200) husi nasionál no estranjeiru mai Oe-Cusse, hodi fo hanoin fali ba mundu katak Oe-Cusse mak fatin ne’ebé uluk istória nasaun ne’e nian hahú.
Reportagen Julmmira Cab Colo
