Pantemakasar, RCAL – Dirijente eskola, hamutuk ho superintendente nain-13 inklui RAEOA, no kargu diretór Nasionál sira, tuir formasaun kuríkulu durante loron rua iha Rejiaun Administrativa Espesiál Oékusi Ambeno (RAEOA).
Formasaun ne’ebé hala’o durante loron rua iha Oékusi ne’e foka liu ba kuríkulu foun, hodi reflete ba situasaun atuál no prepara dirijente eskola sira hodi lori estudante sira ba dalan ne’ebé produtivu no kualidade.
Iha abertura, Sekretáriu Estadu Domingos Lopes Lemos rekoñese katak iha dezafiu barak mak infrenta iha aprendizajen. Maski nune’e, dezafiu sira-ne’e labele sai nu’udar obstákulu, maibé tenke motiva dirijente sira hodi kria estratéjia foun ba prosesu aprendizajen iha futuru.
Domingos enkoraja dirijente sira atu foka ba jestaun eskola no lideransa ne’ebé di’ak, liuliu kona-ba oinsá jere fali kestaun infraestrutura, membru sira, no matéria didátika, inklui nesesidade ba profesór sira iha ensinu tékniku vokasionál.
Durante diskursu, Sekretáriu Estadu husu ba lider sira, atu hatudu pasiénsia no uza dalan oioin hodi fó resposta ba preokupasaun estudante sira nian.
Iha fatin hanesan, Diretór SRE RAEOA, Vicencio Cono, deklara katak bazeia ba dadus ne’ebé rekolla, sira detekta duni kazu balun ne’ebé presiza korreje.
Vicencio hateten, liuhusi vizita surpresa ne’ebé halo ona ba eskola sira, sira nota katak iha eskola no profesór balun ne’ebé la fó sansaun edukativa, no mós dirijente balun ne’ebé hatudu jestaun lideransa ne’ebé menus seriedade.
Entretantu, Dirijente Eskola Sekundáriu Jerál 10 de Dezembru Comoro, Manuel Verdial, ne’ebé reprezenta Munisipiu Lospalos, Suai, Viqueque, no Bobonaro, hato’o agradesimentu ba Diresaun Nasionál no Sekretáriu Estadu ba programa formasaun ne’e, katak lideransa iha knaar importante tebes hodi dezenvolve rai ida-ne’e, no formasaun ne’e ajuda duni hodi unifika programa sira husi nasionál to’o baze.
Formasaun ne’e partisipa husi superintendente 13 inklui husi RAEOA, dirijente eskola 130, no diretór nasionál sira.
Reportagen Julmira Cab Colo
