Pantemakassar ( RCAL 30 Setembru 2026) – Institutu Nasional de Formasaun Dosentes e Profisional da Edukasaun (INFORDEPE) hamutuk ho Ministériu Edukasaun Koarta ohin 30 Setembru 2026, entrega sertifikadu ba dirijente eskola sira iha Rejiaun Administrativa Espesial Oe-Cusse Ambeno (RAEOA).
Sertifikadu ne’e nu’udar rekoñesimentu ba formasaun lideransa ne’ebé sira tuir ona iha tinan 2024. Iha nia diskursu fahe sertifikadu ne’e, Sekretáriu Estadu Domingos Lopes Lemos afirma, formasaun ne’e importante tebes atu forma karakter profesór sira nian, atu dirijente eskola sira bele hatene loloos oinsá atu lidera no hanorin ho di’ak.
Prezidente INFORDEPE, Domingos Martins, esplika katak formasaun ne’e inklui módulu lima ho durasaun oras 120, ne’ebé hala’o ho modelu prezensiál no distánsia, hanesan Dijitalizasaun ICT, Fraternidade Umana, no Étika Profasionál.
Iha okaziaun ne’e mos, INFORDEPE entrega ekipamentu hanesan Mapa Mundu ba profesór sira ne’ebé hanorin Siénsia Sosiál, Istória, no Jeografia iha Ensinu Báziku Terseiru Siklu no Sekundáriu.
Entretantu, Diretór Serbisu Rejionál Edukasaun RAEOA, Vincêncio Cono, husu ba lider eskola sira, atu tau atensaun másimu ba atendimentu públiku, foti desizaun ne’ebé loos, no kontinua dezenvolve an hosi teória no prátika.
Enteretantu, Koordenador EBF 30 de Agostu Masin, Belarmindo Beto, nudar partisipante, sente fuan kontente ho sertifikadu ne’e, tanba sertifikadu ne’e hanesan evidensia no onra boot bele aplika iha eskola, liuliu orentasaun kada fulan atu hasa’e bandeira Nasionál iha Eskola.
Reportagen Julmira Cab Colo
