Oe-Cusse RCAL, 03 Junu 2026, Autoridade Rejiaun Administrativa Espesial Oekusi Ambeno (RAEOA) produs ona Sirkural hodi halo Operasaun ba Animal ne’ebe badiu nafatin iha Sidade Oekusi tanba hafoer sidade no fo ameasa ba ema nia vida bainhira halo movimentu ho transporte hanesan, Kareta no Motor.
Sekretariu Rejional Administrasaun no Finansa, Salvador da Cruz informa, Autoridade RAEOA fortifika ona karta operasaun no koordena ona ho ekipa Orden Publiku hodi halo operasaun ba animal sira ne’ebe mak sei kontinua sirkula livre iha sidade laran nune’e labele hafoer sidade Oekusi.
“Ita sei halo operasaun ba animal sira iha semana oin fulan ne’e, tanba animal sira agora komesa sirkula livre iha sidade Oe-cusse no orden despaixu asina kontratu ona atu bele funsiona hodi bele hala’o operasaun animal ne’ebe sirkula iha sidade RAEOA”, Salvador hatete ba jornalista sira iha Salaun Alfandega Palaban Oekusi, Kuarta (03/06/2026).
Membru Autoridade RAEOA ne’e alerta ba komunidade sira ne’ebe mak hakiak animal hanesan Karau, Bibi, Fahi no seluk tan iha sidade Oe-cusse laran ne’e tenke halo luhan tanba sidade ne’e presiza proteze hodi moos no livre hosi foer.
“Ha’u apelu ba komunidade sira katak se bele hakiak animal fora husi sidade, nune’e ita bele asegura ita nia sidade moos no ita presiza paz no estabilidade. Tanba dala ruma mos akontese dezastre liuhusi animal sira bainhira mak halai korta ita iha estrada klaran”, nia Argumenta.
Jornalista Julmira Cab Colo
Editor Joe Feno
Leave a Reply