Oesilo, (RCAL 29 Setembru 2026) – Atu hadia kualidade serbisu no lori atendimentu tékniku agrikultura nian besik liután ba Agrikultór sira iha baze no liuliu iha suku no aldeia sira, Tersa ne’e 29 Setembru 2026, Autoridade Rejiaun Administrativa Espesiál Oecusse-Ambeno (RAEOA), liuhusi servisu diresaun Agrikultura Oékusi, hamutuk ho Sekretaria Administrasaun Finansa, tau fatuk dahuluk ba konstrusaun manutensaun manutensaun uma extensionista nian. Serbisu ne’e hahu uluk iha suku Bobometo, Postu Administrativu Oesilo.
Iha seremonia lansamentu ne’e, Sekretáriu Administrasaun Finansa RAEOA, Salvador da Cruz, hateten projetu rehabilitasaun ne’e sei kobre postu administrativu haat, hanesan Postu Pasabe, Pante Macassar, Nitibe, no Postu Oesilo, ho Objetivu prinsipál mak atu hadi’a kondisaun uma sira-ne’ebé aat ona, nune’e extensionista sira bele hela ho kontente no motivadu hodi serbisu hamutuk ho xefe suku no komunidade sira.
Membru autoridade ne’e, husu ba extensionista sira atu hela duni iha uma extensionista nian hodi fó apoiu másimu ba setór agrikultura iha suku idaidak.
Iha fatin hanesan, Diretór Serbisu Rejionál Agrikultura RAEOA, José Oki, esplika katak, rehabilitasaun ne’e sei kobre uma extensionista hamutuk sanulu-resin-tolu (13) iha teritoria RAEOA, ne’ebé konsentra iha suku Bobometo, Naimeco, Taiboko, no Usi-Taco.
José Oki hatutan, manutensaun ne’e urjente tebes tanba durante ne’e xefe suku balun la koñese sira-nia extensionista tanba sira hela iha fatin seluk, nune’e DRI planeia ona atu harii uma residénsia foun iha suku hitu (7), ne’ebé to’o agora seidauk iha fasilidade ne’e, ho meta atu suku hotu-hotu iha uma extensionista hodi hasae produsaun agrikultura.
Entretantu, Administrador Postu Pasabe, Paulino Marques, fo nia esperansa no agradesimentu ba Governu RAEOA ne’ebé aloka ona orsamentu ba projetu ne’e.
Paulino Marques informa, ho uma manutensaun sira-ne’e, tékniku agrikultura sira bele funsiona didiak uma extensionista sira ne’e, nu’udar edifísiu serbisu nian iha nível suku, hodi hala’o atividade ho efektivu tanba extensionista sira mak mestre ba agrikultór sira.
Reportagen Julmira Cab Colo
