Pantemakassar (RCAL 05 Outubru 2026) – Krize finanseira gravísiu akontese daudaun iha Rejiaun Administrativa Espesial Oe-Cusse Ambeno (RAEOA).
Orsamentu ne’ebé ko’a porsentu liman-nulu husi Governu Sentral, halo funsionáriu kontratadu no kazuais hamutuk rihun ida resin labele simu saláriu iha fulan ne’e, no balun mós hetan ameasa atu hapara.
Sekretáriu Rejional Administrasaun no Finansa RAEOA, Salvador Da Cruz, iha nia intrevista deklara katak, situasaun ne’e mosu tanba planu rekrutamentu ne’ebé sala iha pasadu.
Tuir Salvador, rekrutamentu sira ne’e la bazeia ba nesesidade instituisaun nian. Maibe daudaun ne’e, Prezidente Autoridade RAEOA kria ona ekipa traballu no mós halo ona vizita ba Governu Sentral iha Dili hodi buka solusaun urjente. Maski nune’e, desizaun finál depende hotu ba Governu Sentral, nune’e, Se la iha dalan seluk, posivelmente RAEOA sei hapara funsionáriu balun iha tempu besik, hodi hein fali Orsamentu Jerál Estadu tinan 2027.
Salvador da Cruz klarifika katak, Bazeia ba dadus, husi totál funsionáriu rihun rua atus haat iha RAEOA, no husi hirak ne’e, metade liu mak funsionáriu kontratadu no kazuais, inklui asesór hamutuk na’in tolun-nulu resin.
Entertantu Akadémiku DITKREO, Vicente Da Conceição Teme, fó hanoin ba autoridade sira katak, rekrutamentu iha futuru tenke haree ba kapasidade finanseira no nesesidade loloos organizasaun nian, nune’e labele repete tan erru ne’ebé fó impaktu negativu ba moris funsionáriu sira nian.
Reportagen Julmira Cab Colo
