Oékussi RCAL, 09 Juñu 2026; Governo Timor-Leste liuhosi Ministeriu Finansas Segunda ne’e fo formasaun ba Funsionariu iha RAEOA ho durasaun loron-5 hahu segunda ne’e no remata sesta ne’e iha salaun Konvensaun palaban Suku Costa Sub-Rejiaun pantemakassar.
Iha abertura formasaun ne’e, Ministra Finansa Regina de Jesus de Sousa hateten, formasaun ne’e foku ba jestaun finansas públikas ba funsionáriu públiku sira ne’ebé hala’o kna’ar iha aprovizionamentu, ezekusaun orsamentál no patrimóniu estadu, iha Rejiaun Administrativa Espesiál Oé-cusse Ambeno (RAEOA).
“formasaun ba funsionáriu sira iha RAEOA husi ekipa tékniku Ministériu Finansas ne’e, sei hala’o durante semana ida, kona-bá jestaun finansas públikas, espesiál ba aprovizionamentu, ezekusaun orsamentál no patrimóniu estadu”
Membru Governo ne’e akresenta katak, Jestaun finansas publikas ne’ebé forte, tenke liga entre planeamentu, orsamentu, aprovizionamentu no ezekusaun, atu bele asegura rekursu públiku sira, nomos uza ba prioridade dezenvolvimentu, tuir lei no regulamentu sira ne’ebé vigora, tanba hanesan lei enkuadramentu orsamentál, no jestaun finansas públikas, lei orsamentu kada tinan, no dekreitu ezekusaun orsamentál ne’ebé mak hasai kada tinan, ne’ebé mak guia ita iha prosesu ezekusaun Orsamentu Jerál Estadu nian.
“Formasaun ida ne’e importante tebes, tanbá kapasidade institusionál no rekursu umanus ne’ebé forte, sai fundamentu prinsipál atu garante ezekusaun programa no projetu governu nian ho di’ak, espesiál ba projetu sira iha dezenvolvimentu RAEOA nian, ho efisiente no transparante.” dehan Vise-Ministra Finansas.
Biban ne’e Sekretáriu Administrasaun no Finansas, Salvador da Cruz, lori Prezidente Autoridade RAEOA nia naran, hato’o agradesimentu ba Vise-Ministra Finansas ho ekipa, tanbá ofrese tempu mai Oé-cusse hodi fó formasaun ba funsionáriu sira kona-bá jestaun sistema finanseira nian.
Iha ambitu abertura formasaun ne’e, iha mós serimónia ofisilizasaun termu entrega funsionáriu husi Autoridade Aduanéira, Autoridade Tributária no Servisu Estatístika RAEOA ba Ministériu Finansas.
Jornalista: Julmira Cab Colo
Editor Joe Feno
Leave a Reply