Pantemakassar (RCAL 28 Setembru 2026) – Atu hametin kualidade tékniku sira nian iha Oecusse, Presidente Autoridade Rejiaun Administrativa Espesial Oe-Cusse Ambeno (RAEOA), Régio da Cruz Salu, Sesta ne’e, asina akordu kooperasaun da-ruak ho Diretor Centro Nasional de Emprego e Formação Profissional (CNEFP) Tibar, Simão Tito Bareito iha salaun Gabinete Presidente Autoridade RAEOA Oébau suku Costa Postu Pantemakassar.
Presidente Autoridade RAEOA, Régio da Cruz Salu, hateten katak akordu ne’e hanesan mekanizmu legál no administrativu ne’ebé importante hodi hatán ba ezijénsia auditoria ne’ebé hala’o tinan-tinan. Autoridade ne’e fundamenta katak, Liuhusi kooperasaun ne’e, RAEOA hakarak hametin mós Sentru Formasaun Rejionál Bansone,hodi replika kualidade formasaun nian hanesan iha Tibar.
Régio da Cruz Salu esplika, kapasitasaun ne’e urjente tebes liliu ba funsionáriu sira iha Unidade Tékniku Fiskalizasaun (UTF) hosi Diresaun Rejionál Obras Públikas,tanba diresaun ne’e jere hela projetu barak ne’ebé presiza kualifikasaun aas.
Hafoen de remata asinatura MoU ne’e, Diretor Centro Nasional Emprego Formasaun Profesional (CNEFP) Tibar, Simão Tito Bareito, ba jornalista fundamenta katak, akordu foun ne’e sei dura ba tinan lima, ho Kooperasaun servisu sei foka liu ba fó formasaun avansada ba tékniku sira iha área dezenu, fiskalizasaun, no estimasaun ba kusto projetu nian, nunee ezekusaun obra iha RAEOA bele la’o ho efesiente.
Formasaun ne’e sei bazeia ba planu anuál RAEOA nian, no fatin ba formasaun bele hala’o iha Oe-cusse, Tibar, ka iha rai-li’ur, hodi analiza didiak kusto no sustentabilidade ba tempu naruk.
Reportagen : Julmira Cab Colo
