Pantemakassar (RCAL 10 Outubru 2026) – Membru Parlamentu Nasionál husi Komisaun D Kinta ne’e, 09 Outubru 2026, halo audensia ho Prezidente Autoridade RAEOA, Régio da Cruz Salu, ne’ebé akompaña husi Sekretáriu Rejionál na’in tolu no diretór rejionál na’in 21 iha Salaun Konvensaun 1 de Maiu, Palaban.
Durante audensia, Vise-Prezidente Komisaun D, Manuel Henrique Noronha, hateten katak vizita ne’e importante hodi observa rezultadu serbisu bazeia ba ezekusaun orsamentu no planu programa RAEOA nian.
Manuel mós husu ba Autoridade atu kontinua serbisu diak hodi defende dezenvolvimentu Oe-Cusse, liuliu foka ba ekonomia mikro ne’ebé liga direta ba povu nia moris.
“Ami husu Autoridade RAEOA atu kontinua serbisu ne’ebé mak diak atu defende Rai Oe-cusse. Ita haree katak iha mudansa boot iha Oe-Cusse, mesmu bee menus maibé iha kolaborasaun diak ho komunidade.”
Entretantu, Prezidente Autoridade RAEOA, Régio da Cruz Salu, rekoñese katak ezekusaun orsamentu iha trimestral segundu nian ki’ik tebes, inklui mós iha setór balun ne’ebé ezekusaun zero porsentu. Maibé, tama ba trimestral terseiru ne’e, ezekusaun komesa hatudu mudansa pozitivu.
Reportagen Julmira Cab Colo
